President’s Message

शिक्षकहरूको पेसागत सम्मान, सुरक्षा र समग्र राष्ट्रको शैक्षिक उन्नयनका लागि लोकतन्त्र, मानव अधिकार, स्वतन्त्र न्यायपालिका र स्वच्छ पत्रकारिता अनिवार्य सर्त एवं आदर्श मानी २०४७ साल वैशाख ३० गते विधिवत रुपमा गठन भएको आम नेपाली शिक्षकको गौरवमय संस्था हो– नेपाल शिक्षक सङ्घ । २००७ सालपछि शिक्षामा भएको परिवर्तन सँगसँगै नेपाल शिक्षक सङ्घको निर्माणका आधारहरू पनि अघि बढेको पाइन्छ । २००७ सालको चैतमा प्रजातन्त्रवादी शिक्षकहरू काठमाडौंको जेपी हाइस्कुलमा भेला भई रामजी प्रसाद शर्माको अध्यक्षतामा तदर्थ समिति गठन गरेका थिए । यस समितिको वैधानिकता पछि श्यामकृष्ण गौतम, आनन्द प्रसाद ढुंगानाले अध्यक्षता सम्हाल्नुभएको थियो । संगठन निर्माणमा हरिहर रिसालको महत्वपूर्ण भूमिका रहेको थियो । वि.सं. २०१३ मा माध्यमिक शिक्षक सङ्घ गठन भयो । त्यसको अध्यक्ष आनन्द प्रसाद ढुंगाना रहनुभएको थियो । त्यसताका प्रजातन्त्रवादी शिक्षकको सङ्घ गठन तयारी तत्कालीन राजा महेन्द्रको २०१७ को कदमले पूरा हुन पाएन । वि.सं. २०२३ सालमा प्रावि सङ्घ गठन भयो । विसं. २०३६ सम्म पञ्चायती राजमा सङ्घको गतिविधि न्यून रह्यो । वि.सं. २०३७ सालमा सबैखाले विचारका शिक्षकहरूको प्रयासमा नेपाल राष्ट्रिय शिक्षक संगठनको निर्माण भयो । २०४१÷०४२ सालमा सरकारको शिक्षक संगठनलाई कमजोर बनाउन ल्याएको मावि र प्रावि सङ्घको अवधारणाबाट शिक्षकको आन्दोलन माथि उठ्न सकेन । २०४६ सालको जनआन्दोलनको सङ्घारमा प्रजातन्त्रवादी शिक्षकहरूले देवेन्द प्रसाद उपाध्यायको संयोजकत्वमा शिक्षकका मागसहित देशमा बहुदलीय व्यवस्थाको स्थापना र आफ्ना मागहरू पूरा गराउन शान्तिपूर्ण आन्दोलन गरेका थिए । जसले पञ्चायत व्यवस्था नै फाल्न सहयोग पुग्यो । प्रजातन्त्र, लोकतन्त्र र मानव अधिकारलाई सर्वोपरी ठान्ने प्रजातन्त्रवादी शिक्षकहरूले अन्ततः २०४७ साल वैशाख ३० गते नेपाल शिक्षक सङ्घको विधिवत स्थापना गर्न सफल भए । २०४७ सालमा स्थापित यस सङ्घले २०७९ चैत्र (२८–३०) काठमाडौंमा नवौँ संघीय महाधिवेशन सम्पन्न गरिसकेको छ ।